廣島機場
第一天抵達廣島機場已經17:35。由於香港人出發時比原定時間「滯後」了半個鐘，所以最後任比憑機師如何超速 (其實飛機有冇超速的概念？)，也比原定時間遲了5分鐘。初時還打算趕及17:45去三原車駅的巴士，那麼就可以一程JR就在八點前抵達岡山。但計劃總趕不上變化，我當時太樂觀了。
廣島機場其實很細，同一座航廈按左右分開了國際線同內陸線。基本上由國際線行過去內陸線只需要少於5分鐘既時間，而且都係位於同一層。廣島機場位處山上，並冇鐵路交通，對外運輸主要靠巴士接駁往廣島市及各大JR站。
如果大家第一個目的地是廣島駅 / 廣島市的話，基本上巴士班次十分頻密，不用20分鐘就有一班巴士開出，約45分鍾車程 (1340yen)就可以到達廣島市區。
不過由於今次選擇即晚前往岡山及錯失了前往三原車站的巴士，所以選擇了藝陽巴士前往白市站轉山陽本線。要留意的是除了前往廣島駅的巴士，其他目的地的巴士都比較疏，所以要留意一下時間。如果巴士開出時間是你抵達時間15分鐘內，除非你沒有寄倉行李，否則你可以選擇定下一班巴士。
由落機17:35，到取回行李時已經17:55，所以就要用自己方法去搵車出岡山。雖然等行李等了20分鐘，但也快過香港那個國際機場很多。 (最近三次回港，未試過由落機後快過40分鐘能取回行李)。
廣島機場巴士班次參考：廣島機場巴士時刻表
巴士站就在國內線入境大堂對出。在國內線既巴士售票機就能購買車票，而售票機隔離係一個顯示版顯示各目的地的巴士班次。
由廣島機場去岡山基本上有下列方式：
- 廣島機場 > 広島駅 > 岡山駅
最貴，但由於出廣島駅班次最多，時間與JR班次最容易夾。除非覺得轉兩程車會浪費青春，又或者超不喜歡廣島機場要即刻離開，又或者你有錢就是任性；這個方式最不推介，因為比其他方式貴很多，巴士加埋JR非指定席要￥6,840。最重要是CP值太底。 - 廣島機場 > 三原駅／福山駅 > 岡山駅
推介路線，轉車最少，巴士連JR需要約￥4,000。不過班次就夾不到UO航班的時間。今次亦因為趕不上17:40 / 17:45的班次，如要坐下一班車已經要18:20，去到岡山都要九點幾。所以亦只好作另一選擇。 - 廣島機場 > 白市駅 > 岡山駅
如果不轉乘新幹線，在白市駅坐山陽本線在系崎駅轉車就能前往岡山，連同巴士費用只需￥2,660。如果在三原駅轉新幹線前往岡山，連巴士費用約￥4,390，比方法2貴了少許。
大家選擇方法2定方法3，就取決於大家的航班時間與金錢。下面這個網頁真的十分實用，無論巴士、鐵路等，都有最快 / 最平的路線選擇比你。
由廣島機場出發，不消15分鐘車程就抵達白市駅。除了在售票機購票，前往白市的巴士也接受車上付費，因為前往白市的巴士其實只是普通既市區巴士。車費￥390。
18:37的山陽本線列車往糸崎方向的列車到站。如果坐18:52的班次，直達岡山只是相較在三原站轉新幹線遲十數分鐘抵達，但價錢就可以平成千幾yen。所以早開的列車不一定早太多抵達。
山陽本線的路線表。
抵達三原駅，就到新幹線既窗口補錢+購票前往岡山駅。
好貴呀。去到三原駅補了票才發覺可以坐山陽本線直達岡山駅。
不過新幹線就係坐得舒服一些，而且有地方放行李。如果坐山陽本線，由於只是普通列車，人多的時候要處理行李就變得十分麻煩，而且可能要企足全程。而今次由白市駅前往三原駅，我也站了一半車程，最主要原因是行李不好放。
Via Inn
到達岡山駅，就即刻到酒店check-in放抵行李。今次住既酒店係Via Inn，酒店離出閘口超級的近，只需要兩分鐘步程。如果大家計劃以岡山駅作中轉站，這間酒店無論價格，設施及位置也值得推介，是CP值十分高的一間商務型酒店。
P.S. 酒店大堂在5/F，而樓下2/F - 4/F就係GU，又係大家掃貨既好地方。
酒店大堂可以自取免費茶包、毛巾、棉花棒。
房間算是很標準的商務客房，比起東橫inn及Dormy Inn來得整潔，而費用也只是約600蚊港紙(連早餐)。
房間望出去的岡山市夜景。遠處就是東橫Inn。因為酒店相對近西口，所以街道車流比較少。
放抵行李休息一陣，已經21:00左右。去過日本既朋友都知道，日本好多店就鋪好多就關門。作為一個毒撚，要夜晚晚一條友唔去居酒屋又要食得自然，就需要做定功課。而今晚就選擇左本町既小豆島拉面醫肚。
點了個出名既醬油拉面。同時見到下面呢個醬油汽水，當然都要點埋黎試下啦。
開餐啦！成餐飯加埋都係￥1000有找！
小豆島拉面在倉敷及小豆島本身都有分店，不過本町呢間夜晚就冇咁早關門同埋唔使點排隊。如果去到岡山夜晚想搵野食，本町呢而除左小豆島拉面重有好多選擇，而且大多關門時間都在晚上十點以後。
因為第二日要趁落雨前走多幾個景點，所以食完都返酒店休息。
(實際上食完都已經10點幾，好多舖頭都已經關左門)
沒有留言:
張貼留言