四國の旅2016 - 出發篇

是咁的，話說今次既旅程，都係源於上年年尾香港快運的88蚊優惠機票。當然，就算冇左呢張88蚊機票，亦都阻止唔到我呢個廢青在年中離開香港。

最近Viu TV開左個"帶著矛盾去旅行"既節目，每集都請左兩個性格或價值觀上南轅北轍既公眾人物一齊去旅行，睇下佢地之間會唔會刷出任何火花。但我就覺得，自己一個去旅行，才是真正的矛盾。自己做既每一個決定，都影響著往後每一個行程，當你每個地方都想去或者每樣野都想做既時候，自然就會產生矛盾；而呢d矛盾，亦都要自己去面對，不能夠委過於人。

講返張機票，話說上年十二月時UO推出左88蚊既機票優惠 (雖然我都未聽過UO會唔推出優惠)，剛剛去完大阪跑完馬拉松既我，已經心飛癢癢想再去日本。

當大家討論緊要點樣搶福岡機票既同時，我發現廣島可能景點配套不多，好多人覺得CP值相對低，所以比較少人討論。而我呢個生活在香港既廢青，就係最怕人多既地方，廣島呢個新航點及少情侶放閃既地方，絕對適合我。亦都因為廣島 / 山陽既景點比較散，自駕亦成為我選擇廣島既一個動力。

HK Express特價機票

其實當時買機票時，只知道廣島有個原爆紀念館，對於附近的景點全無概念。到後期上網睇過各旅遊達人既blog及forum，先知道廣島入四國都幾方便。於是陰差陽錯下就成就了呢一個8日7夜既山陽四國自駕暴走之旅。

等左半年，今次坐UO1822由香港飛廣島，起飛時間預計為13:05。最後都係delay到13:35先起飛。明明check左早一個星期飛廣島既機都冇delay，唔通我真係咁黑仔？最後偷聽到機長同地勤人員講，話原來重有d文件要處理。不過亦都因為咁，我終於知道點解UO都話自己好準時。因為佢寫既航班抵達時間係包括埋delay，即使遲左半個鐘先起飛，都可以準時到達。如果早左到，重可以同人講有幾多成既航班超出預期表現。

出發當日預早左兩個鐘到機場，因為有priority check-in，所以唔使五分鐘就搞點check-in。再睇返呢條隊，值唔值就見人見智。不過去台灣呢d個幾鐘機程既航班，我就未必會選擇comfort seat。

HK Express T2既check-in counter

之前坐過幾次LCC，由T2 check-in完之後都on居居咁由T2落返地面過返T1再上返離境大堂。今次就選擇左另外一個方法，就係T2離境大堂check-in後，往機鐵方向行上去：

如果有機鐵到站，其實佢會開曬兩面門 (其實機鐵班次都好密，等一班車既時間點都快過你落地面過T1)，一面係去T1離境大堂，另一面係去T2離境大堂。當大家見到下面既畫面，應該都估到點做。

今次第一次在中場客運廊上機，當然要早少少去影下相啦。如果話T1係國泰既專用航廈，咁中場客運廊就應該係HX / UO既專用航廈。

之前上網見到在機場禁區Relay書店出示DBS Black Card及有效登機證即可免費換領報章/雜誌一份。點知去到中場客運廊，先發現係冇Relay的，要去返T1。所以大家下次想換雜誌，記得要在T1換定。

另外一提，中場客運廊都有中銀同埋匯豐既櫃員機，不過各得一部，至於會唔會壞機，就真係睇你彩數。食野方面，其實都可以去到中場客運廊先食野，感覺上冇T1那個重多人過旺角既food court咁多人，同埋都唔使點等位。

四處hea下，買左杯咖啡飲，就準備上機。唔知中場客運廊係咪主要都係LCC同埋比HX / UO用，佢個室外觀景台其實即係吸煙區，反而冇左T1那些室內吸煙房。



日本最近既入境卡改左version，填少左好多野。亦都因為咁，本護照終於都打少左幾多釘書釘。



廣島！我來了！



小弟平時好日都唔寫下blog，希望呢個blog可以同人家分享一下所見所聞。資料性既野我真係唔敢班門弄斧，只係盡量把對每個景點的感覺寫下，讓大家可以決定逗留時間定去唔去玩。當然，更多的篇幅是我對呢個旅程唔同時間的感覺 / 廢話，希望大家唔好介意。